Piykny miesionc

Wszyscy wiedzom, że moj jest miesioncym piyknym i szczyńśliwym, a ludzie w nim urodzyni też do takich należom.

 

Czamu tak jest to idzie zgodnyć - bo tak - luty mo sztyry litery, a jak go spomnicie zaroz Was zima przeleci, a moj mo yno trzi, a spróbujcie powiedzieć mój - jak Wom bydzie cieplutko. Pokożom się Wom kwiotki, szpacyry do lasa, śpiywajonce ptoszki, ucieszne dzieci, pootwiyrane okna, jednym słowym - Eden.

 

W Polsce na moj przipadajom roztomańte rocznice państwowe i inksze miyłe sercu uroczystości. Od downych czasow Polocy, w mieście czy na wsi, do przyjymnych chwil zaliczali nabożyństwa majowe, na kerych śpiywomy: „Chwalcie łąki umajone”, jakby chcieli my cało prziroda zaprosić do prziłonczynio się do tego spiywanio!

 

W maju som matury, jest i Dziyń Matki. (Tak mi się połonczyły matury z matkami). Bo tak naprowda to najbardzij te matury, ze swoimi dzieciami przeżywajom mamy.

 

Ciyrpliwie siedziom pod szkołami i czekajom na swoji wielki (a jednak) dziecko.

 

Pora lot tymu moja cera zdowała matura, żeby jom dostać trzabyło też umieć. Musiałabych pospominać te czasy, jak to maturzystki w skromnych mundurkach siodały do egzaminu. Teraz matki fest się starajom jako oblyczka wybrać swoi cerze, bo co do tego zwyczaje fest się zmiyniyły-co cery rozkożom, to mamy kupiom.

 

Moj jest też czasym uroczystości Piyrszokomunijnych. Jezderkusie co to się bydzie dzioło!

 

Komputerow i kołow może we sklepach braknyć! Bo dzieci już sie obrozeczkym i bomboniyrkom nie ukontyntujom. Zygarek i komorka to już prawie każdy mo.

 

Pisza tak nie ze zowiści, bo przeca nie byda porównywać do downych czasow, ale nasze pokolyni te wydarzyni przeżywało inakszy. Gościna była w doma, prziszli potkowie, starziki. Mama napiykli kołocza, kupiyli piernikow. Gościna była fajno, tak jak bez świynta. A my mali czuli, że som my ważni.

 

Przed tom uroczystościom szli my pryndzyj spać, a w dziyń komonie fest nas wachowali, co by my przed idzyniym do kościoła nie zjedli kaj jakij posypki, (to był wtedy post Eucharystyczny). Teraz też jest inakszy.

 

W naszym kościele u Świyntego Izydora bydzie odpust. U nas jeszcze som gospodorze, co robiom na polu, no a św. Izydor jest patronym rolnikow.

 

Bydom odpustowe budy, ale dali od kościoła, a szczylani, choć zabronione bydzie, bo odpust je yno roz w roku i muszymy to przetrwać.

 

Teraz o „łikyndzie”(weekendzie). Szpetnie się to czyto, trocha lepszy słocho, bo w tym roku majowy łikynd był wyjontkowo dłogi. Szkoda yno tych aut, co bez tyn łikynd na złom trefiyły, bele yno ludziom nic się nie stało - bo nikiedy przihaltować pomog św. Krzysztof…

 

Kierego obrozek majom prziklejomy kole kierownice.

 

Z życzyniami spyndzynio wolnych dni szczyńśliwie i uciesznie, pozostajonco w doma.

 

Aniela Langer – autorka felietonu – jest laureatką konkursu „Ślązak Roku 1996”, w 2001 r. otrzymała tytuł „Ślązaka nad Ślązakami”

 

Ślonzoczka Aniela.