Poznoł dochtor u chorego

Ludzie kichajom, kuckajom, bo skyrz pylynio stromow (drzew) i trow ludzie dostowajom alergie (tak się to po dochtorsku nazywo).

 

Te dochtory, co jeszcze przijmujom, abo od nerwow abo, że chory ni musi wiedzieć na co jest lyczony, recepta piszom stenografiom, że nie umi ani aptykorka przeczytać.

 

Za to na pigułkach pisze: „przed użyciem przeczytać ulotkę”. Jo, że już trocha słabo widza biera bryle i czytom: „diclo duo zwiększa stężenie soli litu i digoksyny w osoczu”. No i co ? Jak ech nic nie wiedziała tak nie wiym. Słyszałach w autobusie jak se dwie starsze babki godały o swoich chorobach i czym się lyczom. Ta jedna godo:” Jo biera na rano jedna bioło i jedna czerwono a do cyckanio mom taki amolowe pigułki. Ta drugo miała ciśniyni, to brała yno biołe i telki jak fazole- różowe. Na starość to się yno utyskuje i godo o tym, co boli.

 

Moj kamrat ze szkoły opowiadoł mi o tym, co przeżywoł jak się mu baba rozchorowała. Zawołoł dochtora (prywatnie) wystraszony puściył go do izby, a on żeby nie zawadzać siedzioł w kuchni. Naroz dochtor otwiyro dzwiyrze i pyto: mo pan majzel i młotek? Za chwila jeszcze: „a mo pań kombiniyrki abo klyszcze?” Chłop mu doł, ale ze strachu zaczon na nowo rozmyślać. W końcu nie wytrzimoł, wloz do izby i pyto:” co moji dolygo?” A dochtor powiado: „jeszcze nie wiym , bo mi się zomek w taszy zacion a tam mom słochawki” .Z pomocom chłopa tasza otworzyli, dochtor choro osłochoł, doł recepta, no i baba chnet ozdrowiała.

Nikiedy dochtory we szpitalu nie dość, że som mondrzi, muszom być i szprytni. Dwa lata tymu zdarzyło mi się też być we szpitalu. Na nasza sala prziwiyzli starszo pacjyntka, kiero skarżyła sie na ból w brzuchu. Dochtory badały, pielyngniarki brały krew do badanio, no ale na wizycie szef powiedzioł, że nic groźnego nie widzom. Przijynto była w piontek a zwolniono we wtorek. Nom się też nie zdała, że jest choro. Miała radio, cały czas grała, jak my tak z niom pogadywały to powiedziała, że młodzi wyjyżdżajom na tydziyń i ona miała być im przi dzieciach, a tak to młodym zrobiyła na złość.

 

We szpitalu był też ciynżko chory chłop, żonie, kiero przichodziyła na odwiedziny dochtor fest przikozoł, żeby śnim yno o przijymnych rzeczach godała, żeby się nie znerwowoł, żona siodo przi łożku, głosko go po głowie i pado:” fajnie Anteczku, że ci się już polepszyło, ale jakby tak co, to chcesz mieć pogrzyb z muzykom, czy bez?” Nie wiym czy po tych odwiedzinach poznoł dochtor u chorego jako zmiana?!

 

Jak ech se na odcinku z rynty obejrzała wiela mi odciongajom na NFZ to starom się to serdecznie wykorzystać, pigułki biera już chnet 10 lot i jeśli wontroba wytrzimie, to myśla, że jeszcze pora lot pociongna.

 

Życza wszystkim tela zdrowiczka i uciechy jak mi przi urodzinach winszowali, wszyscy co mi pszajom.

 

Ślonzoczka Aniela