Niech się nom rodzi dużo gryfnych dzieci

Szczyńśliwe te, co to się nie zaczły „niechciane” tak jak to nikierzi mianujom: „wypadek przi pracy” abo, że to jest owoc kalyndorzyka małżyńskigo, bo to by tak wyglondało, ze nie som tymu dzieciontku radzi.

 

Nikiedy tak widzymy, że tam kaj by dziecko miało sie dobrze to ni ma. Ale cudzego dziecka nie chcom, bo bojom się, że jak tyn mały weźnie coś z matki abo ożratego ojca (te gyny) to yno na prziszłość niecherski widoki.

 

Prziglondomy się, że nastompiył „wysyp noworodkow”. Niech sie rodzom! Roz ech tak na konkursie powiedziała: „Niech nad naszym Ślonskiym dycko słońce świyci i niech się nom rodzi dużo gryfnych dzieci. Starki ze starzikiym niech im się radujom i tela jak umiom chyntnie pomogajom”.

 

Downi bywało, że nikiedy jedyn z kolybki wyrostoł a drugigo młodo mama tam pokłodała.

 

W czasach wojynnych bardzo opiekowali się ciynżarnom (tzw. Werdende Mutter - prziszło matka). Były dlo nich prziwileje, dodatkowe kartki żywnościowe i odzieżowe. Pamiyntom to, bo jo miała już wtedy kole 18 lot. Dostały też przidział na oblyczka cionżowo i to mi się dzisiej spomino, bo prziszłe mamy wyglondały w luźnych klajdach gryfnie i tak by rzec majestatycznie. Po towor do sklepu szły bez kolejki, chocioż nikierzi przezywali, bo te luźne oblyczki też pomogły ocyganić( zygłowek się fajnie pod tyn luźny klajd zmieściył). To była zapobiegawczo robota, bo na wojnie zginyło moc chłopa, a że my mieli noleżeć do Wielkigo Państwa oczekiwało się dużo prziszłych obywateli.

 

Po wyzwolyniu to już były kolejne roczniki, co pozakłodały rodziny, no... bo wszystki chłopy na wojnie nie padły. Też rodziyły się dzieci, ale ciynżko było dostać kupić jako oblyczka do dzieci. Jak prziszoł jaki przidział do sklepu, to ustawiały się kolejki, żeby dostać pora rajtuz abo jakielka (kaftanik). Dyć ani wozków nie szło kupić! Te prziszłe matki mianowali, że jest przi nadzieji abo, że się spodziywo a już tak fest uroczyście, że jest w stanie błogosławionym. (O cionży wcale przi dzieciach tak otwarcie się nie godało.)

 

Teraz te dogodności z tymi becikowymi nie som złe - niech dajom jak im w rzondzie styknie. Dyć niedaleko nas jedna bogato gmina dowo jeszcze „brzuszkowe”-to już jest coś ekstra poznać dobrych gospodorzy...

 

Jeszcze o tych ankietach „Rodzić po ludzku” dobrze, że się wypowiadzajom prziszłe mamy, kierym noleży się dobro opieka ale... czy przipadkiym nie som nikiere pieślawe. Chcom znieczulynio i adorowanio a przeca na poczontku było już powiedzane: „W bólach rodzić będziesz”. Znom taki przipadek, że 6 lipca dziecko było jeszcze z mamom w brzuszku na polu kopało razym śniom we ćwikli a o 12 w nocy było już na świecie.

 

Tak nikiedy się widzi te prziszłe mamy, że abo z uciechy, abo z biydy oblykajom taki młodzieżowe oblyczki, że nikiedy wyglondajom po naszymu - łoszczymnie (nieestetycznie). Keby tak ku tymu becikowymu dali jeszcze tej prziszłej mamie talon na odpowiednio oblyczka, to by już tak wszystko pasowało.

 

Wszystki babki co som przi nadzieji, pozdrowio trzikrotno mama Ślonzoczka Aniela