Cygaństwo mo yno jedna noga… słomiano

Człowiek to jest taki stworzyni, kiere mo roztomańte upodobania. Gdo to widzioł, żeby tak nałogowo czytać gazety i to roztomańte. Nikiere czytom „od deski do deski” som mondre a piszoncy w nich opisuje tzw. ”sprawy bieżonce”.

 

Chca pisać o ludziach, kierzi dosłownie pojyni wartość wypowiadanego słowa o przisiyndze. Tako pamiyntno rocznica obchodziyli my we świynto Matki Boski Czynstochowskij. Jak pamiyntom downi to my też przirzeczynia polecone i napisane przez wielkigo duchym Człowieka w te świynto w kościołach odnowiali. I co z tej całej przirzeczyń przez lata my jako Polocy wypełniyli? „Przyrzekamy stać na straży nierozerwalności małżeństwa”. Czy taki Polok czy Polka, kiero w Urzyndzie Stanu Cywilnego trzeci roz powtorzo: „Ślubuję ci miłość, wierność” itd. zdowajom se sprawa ze słów, kiere wypowiedzieli. Czy to tako przsiynga, choćby yno przed polskim godłym jest tak ważno jak kupiyni na raty auta. Tu trza podpisanego kontraktu dotrzimać i raty płacić a w urzyńdzie za opłatom tyn piyrszy kontrakt się niszczy i pisze się nowy. Chwała tym ludziom o kierych czytałach w najnowszym tygodniku. To był opis ludzi, kierzi jeszcze żyjom i kierzi jak mieli przisiongać jako wojocy, nie chcieli się stać kłamcami i odmowiyli skłodanio wojskowej przisiyngi. Dostała mu się surowo nauczka, z podchoronżego zrobiyli pomocnika murarza, żeby w końcu jako chorego abo raczyj „niebezpiecznego” zwolnić z wojska. Teraz dopiyro we swoi teczce przeczytoł, co śnim zrobiyli. Dzisiej jest posłym i mogymy być pewni, że poselsko przisiynga złożył z pełnom świadomościom, nie ocyganiył wtedy, nie ocygani teraz. Tak trzimać Panie Pośle! Ze Ślonska idom za Panym najszczersze życzynia.

 

Jest tako pieśniczka wojskowo „Przyjedź mamo na przysięgę...” to było taki dodatkowe zaproszyni, na kiere my pora razy jeździyli. No bo zaprosiyli na uroczystość to my obowionzkowo jechali. W latach 70-tych znod się jednak i taki jedyn z Rybnika, co napisoł: „Nie jedź mamo na przisięgę” bo on nie chcioł cyganić i nie przisiongoł - nie otwiyroł gymby...

 

Dużo by szło godać jeszcze o inkszych przisiyngach. Co się stało z przisiyngom Hipokratesa! Niech wołajom o tym mali zabici ludzie, a ci co ta przisiynga skłodali niech się opamiyntajom. Jest taki od downa noszony krziż harcerski. Wiela razy znojdzie się na niegodnej piersi starszego druha. A to co jest na nim wypisane wcale do uczynkow nikierych nie pasuje! Taki stare powiedzyni: „Na cygaństwie świat stoi”, ale też jest inksze: „Cygaństwo mo yno jedna noga a jeszcze słomiano”. Najbardzij to teraz sie sprawdzo te drugi, bo słomiano noga podwijo się co kolejnymu ważnymu gościowi. Wiela krziwdy przewijo się na sondowych przisiyngach. Jak chycom kogo na krziwoprzisiynstwie to spotyko go kara, a te niewyjaśnione krziwdy, kiere ciongnom się z pokolynio na pokolyni gdo odpokutuje? Przirzeczynia, przisiyngi, ślubowania, kiere zaczynajom się od szkolnej I klasy tracom trocha na ważności. Bo czy taki mały uczyń myśli o tym co godo?... Abo możno bardzij o tej tycie, kiero dostoł od mamy...

 

Ślonzoczka Aniela