Wodzisław folklorem stoi

Godajom, że w tym naszym Wodzisławiu psinco sie dzieje. A jo se tak myśla, że jednak tak ni ma. Łoto we sobota w Wodzisławskim Centrum Kultury boł wieki fajer, a dokładnie Wodzisławske Spotkania z Folklorym.

Wiycie kupa ludzi, bo uczestikow boło mono ze 400, a do tego łod nich familije, kamraty.

No i nojważniejsze, że tam boł mix pokoleniowy- łod starek po oziymdziesiont lot, po bajtle kiere jeszcze do porządku nie poradzom sie wygodać. Ale wszyscy mieli jedyn motyw, cel, jak to sie terozki piyknie godo- folklor. I to je nojpiykniejsze.

Bo folklor trza flyjgować- same sie nie dzieje nic, na tym Bożym świecie. O wszysko trza dbać. Jak kwiotka w doniczce nie podlejecie, to tyż nie urośnie, ani nie zakwitnie.

Ale widza, że nasza ziymia wodzisławsko dobrze stoi z folklorym. Przeca ludziska durch godajom naszom godkom, do tego tradycja króluje na stołach i we głowach.

Zresztom byda powtarzoł do końca swojich dni, jak profesor Miodek w 1999 roku padoł, że:

„nojpiykniejszo odmiana gwary śląskij pochodzi z okolic Wodzisławio i Rybnika”. Momy nojmyni germanizmow, a do tego je śpiywno i ni ma tako ciynżko jak we Bytomiu czy u Cidrow we Radzionkowie.

Yno jeszcze trza było by odtworzyć nasze stroje ludowe. Z tym je nejgorszy. Kobiyty po 60 lot chodzom w strojach paniynek, bez chustek na gowie. A to już błąd w sztuce. Przeca wydano baba musiała chodzić we chustce, do tego jakla z pufkami, rock i kwiycisty fortuch. A wszysko ukoronowane czerwonymi koralami.

Moim marzyniym je to, żeby ludzie przestali sie gańbować łażynio we takich strojach. Górale sie tym aszom, a my jak jakie gupieloki śmiejymy sie z tego. A to świadczy yno o tym, że nie szanujymy swojich korzyni. Kożdy strom bez masiwnych korzyni sie obuli. Beztoż trza to naprawić.

Na razie moga pedzieć, ni ma źle. Ale dużo jeszcze roboty przed nami. A Wodzisław niech bydzie do końca świata miejscym spotkań folkloru. Pyrsk.

Asiś - być dumnym

psinco - nic

kupa - dużo

durch - cały czas