Wielkie Rychtowani

I uzaś jak kożdy rok momy świąteczno gorączka. Przeca do wilije momy już godziny, a z robotom som my w lesie. Nie spomna już o geszynkach kiere przeca trza kupić. I do tego jeszcze tak, żeby kożdy boł zadowolony.

Porządki kole chałupy, we środku ni, o naszym środku nie spomna. Trza tyż se zrobić porządki we gowie, co komu trza wrocić, żeby na świynta nie zostać z dłogiym. Bo bezmałaś potym, cołki rok może sie za nami to ciągnyć.

Kristbaum trza kupić, postrojić, o lampkach na dworze już nie spomna. Jo dycki stroja we wilijo rano, żeby poczuć prawdziwo świonteczno magio, ale dziypiyro w świąteczny czas.

Bo mom taki wrażyni, że jakby nie Wszystkich Świyntych, to we sklepach świynta były by łod października. A rychtyk świąteczny czas je łod wilije do Trzech Kroli.

Na świynta trza tyż powarzić- moczka, makowki, kapusty, harynki w łoccie, kapra zacebulować, o oporządziyniu ryb nie spomna, Choć dzisio zbijani kapra je passe, bo przeca to taki nieetyczne i niemoralne. A kaj ta tradycjo, że kapry musiały pływać we wannie?

Tyj roboty je tela, że nikiedy człowiek siodo do wilijo drek zmachany. Ale za to, we świynta mogymy se to odbić. Przeca świynta som na odpoczynek i tego wom życza. A jakbyście z czym nie zdążyli, to nie stresujcie sie za fest. Przeca świynta to czas spokoju, radości, a nie nerwowki.

Życza wom tyż, żeby w doma piyknie woniało, a wom wszysko szmakowało. Pyrsk

woniało - pachniało

wilijo - wigilia

kristbaum - choinka

kaper - karp