SOS do żołądka

Świynta, świynta i po świyntach. Ale latosi świynta były wyjątkowe skiż tego, że do tego świyntowanio doszła jeszcze niedziela i wszysko rozciągło sie ło jedyn dziyń dłogszy.

Do tego zarozki sylwester, Nowy Rok, niedziela, a za dwa dni Trzech Kroli.

Kaj do kogo nie wleziesz , tam cie czynstujom moczkom, makowkami i inszymi maszketami. A sadełko yno puchnie. Do tego trza pozjodać wszysko ze świont, bo to je przeca szkoda. I człowiek puchnie jak krepel, o żołądku nie spomna, kiery musi to wszysko przetrowić. I co tu robić?

Jo wom proponuja sie trocha odmaścić. Beztoż nojlepszy jakbyście na śniodani narychtowali se hawerflokow, a na łobiod se nawarzyli zimiokow z maślonkom, roztomańto gymiza (brokuła, blumkol, marekwia, seler, czy pietruszka).

A do tego nie wiym czy wiycie, że gymiza dobrze odkwaszo nasze organizmy. A po takim maratonie obżarstwa nie myście se, że u wos je inakszy. Wątroba, żołądek i trzustka miały w tym okresie co robić.

A do tego wszyskigo proponuja sie trocha wiyncyj ruszać. Basyn, narty, szpacery na pewno żodnymu nie zaszkodzom. I choć skiż tego mrozu, nie bardzo sie chce z chałupy wylazić, jo jednak proponuja ruch na świyżym lufcie. Bo wymrozić sie ni ma źle, a chocioż wszyskie bakterie idom weg.

Zresztom nie jedyn mo noworoczne postanowienia i chciołby w tym 2016 cosik ściepać.

Na koniec winszuja wom wszyskigo co nojlepsze w tym 2016 roku i niech sie wom darzy, a roczek bydzie lepszy łod tego co sie praje skończoł. Pyrsk

praje - prawie

idom weg - znikają, giną

krepel - pączek

hawerfloki - płatki owsiane