Czelodki przybywo z roku na rok

„Czelodka po naszymu” to sami laureaci konkursów „Po naszymu, czyli po śląsku”. Co roku, po kożdym tym konkursie przibywo nojmynij sztyrech członkow, bo tela dycko jest tych laureatow. Trzech z kategorie dorosłych, a jedyn z młodzieżowyj. Co roku tyż spotykomy sie przeważnie w okresie przed, abo po Godnich Świyntach.

 

Latoś trefiyło sie spotkać trzinostego stycznia, a zorganizowała to Ślonzoczka roku 2000 Maria Duńska z Katowic.

 

Ci co tyn konkurs pamiyntajom od poczontku, to na pewno wiedzom, że piyrszy mioł miejsce w 1993 roku, a wymyśliła go redaktorka Radia Katowice pani Maria Pańczyk-Poździej i cieszy sie do dzisioj niysłabnoncym zainteresowaniym. Mocka rybniczan zostało tyż laureatami tego konkursu i tukej niyskromnie dodom, że jo był wiceślonzokiym gynał tego piyrszego konkursu. W nastympnym konkursie w 1994 roku Ślonzokiym roku zostoł śp. Henryk Konsek z Gotartowic. A w 1995 roku wiceślonzoczkom została Anna Stronczek z Kłokocina. W 2001 roku tytuł Ślonzoczki Roku dostała Betina Zimończyk z naszego miasta.

 

Marysia Duńska, kero latoś zorganizowała te spotkanie czelodkowe „Ślonsko Wilijo”, została Ślonzoczkom roku 2000 i zasłużyła se na to piyknym opowiadaniym po naszymu o swojij cerze, kero wybrała swoji życie służonc Bogu, bo poszła do klosztoru. Poznali my teraz ta cera, bo tyż gościyła już jako zakonnica na tym naszym trefie.

 

Zaczła sie ta „ Ślonsko Wilijo” mszom o godzinie drugij po połedniu w kościele Najświyntszego Ciała i Krwi Chrystusa w Katowicach-Piotrowicach. Mszo była w intyncji synator Marii Pańczyk i wszystkich uczestnikow tego ślonskigo konkursu, a celebrowoł jom farorz Buchalik, kery z Boguszowic pochodzi. Piyknie śpiywoł kolyndy chor z tego kościoła, a po mszy przijechoł arcybiskup Damian Zimoń i tyż wysłuchali my jego krotkigo kozanio o naszym wkładzie w rozwoju kultury ślonskij.

 

Po mszy pojechali my do piyknie przistrojonyj na te nasze spotkanie restauracyje „Vena” w Katowicach-Piotrowicach. Piyknie tam było i jodło tyż było wilijne: kaper pieczony, zupa grzibowo, makowki i kompot z pieczek. Zespoł „Familijo” ze Skrzyszowa tyż nom dycko w tych spotkaniach czelodkowych towarzyszy, to tyż i tym razym piyknie nom śpiywoł kolyndy po naszymu. Za rok juzaś sie trefiymy.

 

Bogdan Dzierżawa – wiceślązak Roku1993