Nie dejmy sie chorobie

Witejcie roztomili Ludkowie!

Co tu dużo godać, drapnoł nos taki szpetny czas- bo i zima na dworze, dycki padze i nigdy nie wiadomo co. Bo roz dyszcz, roz śnieg, abo dyszcz ze śniegiym.

Przi takij pogodzie roz dwa idzie łapnyć ryma, o kuckaniu niy wspomna. Ale nie starejcie się, bo som przeca starczyne sposoby na to wszysko.

Nojprzod musza wom pedzieć, że fest ważne je to, co my jymy, skiż tego, że w jodle musi być dużo witamin i tak po pańsku godajonc mikro i makroelemyntow. A po naszymu to cza jeść dużo kiszonyj kapusty (najlepszy tyj naszej udeptanej), zimiokow, bo w nich je dużo witaminy C. No i jeszcze bardzo ważno sprawa- Ludkowie pijcie bez zima kompoty, w kierych tyż som naturalne witaminki.

No a co zrobić jak nos tak rychtyk drapnie chorobsko. Na przeziymbiyni nojlepszo je wodzionka z czoskiym, abo zgrzote piwo z grzebyczkami, skurzicom, zozworym, miodym i na koniec wlotym uczytym żołtkiym. Po wypiciu cza yno wartko pod pierzina i czekać aż wylezom siodme poty. Pamiyntejcie chorobsko musi z nos wylyź, beztoż cza sie wypocić.

A jak w karku boli- toż zaś nojlepszy je syrop z cebule z czoskiym i łyżyczkom miodu. Zrobić se do krałzki i po łyżyczce popijać. Godom wom jak rynkom odjon, a i na kuckani fest pomogo.

Na goronczka najlepsze som swiyntojanki, czyli kompot z czerwonyj porzyczki, wymiennie może tyż być czorno porzyczka. A jak zaś w piersiach furczy, ni ma nic lepszego jak namazać się gynsinom i dać na to pielucha. Pamiyntejcie, że antybiotyki to najgorsze pieroństwo, bo niszczom wszysko i te dobre i złe bakterie. Beztoż  jak już kiery musi ich użyć, niech pije dużo kiszki i maślonki, żeby te bakteryje (naturalne) curik dostać.

Życza Wom Ludkowie, dużo, dużo Zdrowio. Pyrsk!

---

Słowniczek dlo bajtli:

Drapnoł – złapał
Dycki padze – przeważnie pada deszcz
Ryma – katar
Kuckani – kaszel
Zozwor – imbir
Krałzka – słoiczek
Kiszka – kwaśne mleko