Bożonarodzyniowe Jarmarki

Wiycie pora dni tymu przijechoł żech z Nimiec, a bołech tam ważić na Weinachts Markt, czyli takim Jarmarku Świątecznym.  I rychtyk idzie ich podziwiać za flyjgowani starych tradycji. Wszyndzi postawiane kristbaumy z lampkami, fol piernikow i inszych ciacidełek. Na takim Jarmarku cza zaliczyć obowiązkowo woszt z żymłom i grzote wino z korzyniami. I to mie fest haltło, że Niymcy durch by yno jedli woszt. A do ciekawostki Wom powiym, że nojlepszy do nich woszt , to je polski woszt. I to nos yno może cieszyć, że momy taki wyroby, kiere se tela ludzi chwoli.

Ale oprócz tego coch sam napisoł, do mie piykne boło to, że ci ludzie tam prziszli, stoli na dworze i godali ze sobom, choć pogoda była rychtyk szpetno i durch kidało. U nos żodyn by sie ani nie ruszoł w taki czas, a łoni o krykach, balkonikach i tak prziszli. Boł to czas prawdziwego fajrowanio adwyntu.

Piykne tyż boło trombiyni w roztomańtych miejscach hejnałow adwyntowych. Wtedy już zaczynało sie czuć tyn magiczny czas.

To wszysko już do nos przichodzi. I tak se mysla, że wcale niy idzie o to żeby nakupić roztomantych graczkow, ale iś na taki Jarmark i pogodać z somsiadym, familijom. Tak po prowdzie,  to do mie, je to przigotowani do tych nojpiykniejszych świont, na kiere czekomy cołki rok.

---

Flyjgować – pielęgnować

Kristbaum – choinka

Cacidełka – ozdoby

Haltło – zdziwiło

Kryka – laska