Regionalnie sie podzioło

Kochani Ludkowie godo sie sztyc, że som my w zjednoczonej cołkij Ojropie, ale tyż ta Ojropa jest Ojropom regionow. I moga na to przitaknyć i pedzieć, że rychtyk tak je. Bo przeca granic ni ma, ale za to promuje sie durch nasze regiony. I chwała za to. Chciało by sie pedzieć, że momy koloryt społeczny.

A w tyn łikynd, jak to sie terozki godo podzioło sie regionalnie.

Bo we Chorzowie były targi Atrakcje Regionow, jo tyż tam ważoł. A prezyntowały sie tam roztomante regiony i mini regiony. Szło se pomaszkecić, kupić produkty tradycyjne, rynkodzieła, a przi tymu posłuchać piyknej muzyki.

We niedziela we Zawierciu była impreza, kiero mie je nojbardzi blisko sercu, bo Festiwal Kulinarny Śląskie Smaki. Była to już 9-to edycjo i dycki je na ni fol ludzi. Ale to je nojlepszo oznaka, że Ludziska tego poczebujom, że za tym je jim tesno. A były rolady, galerty, kopy i inksze dobroci. No i  musza sie wom tyż pochwolić, że ekipa łod nos ze Wodzisławia szafła drugi plac. To tym bardzi momy sie czym aśić.

Kochani Ludkowie, nojważniejsze, żeby nie zapominać, skond my som i flyjgować te nasze dziedzictwo kulturowe, bo bez tego bydymy bezbarwni i nijacy. Pyrsk!

---

Aśić – chwalić

Fol – dużo

Tesno – tęsknią

Galert – galaretka z nóżek

Szafła – zajęła