Pic na woda z cholesterolym
Felieton Remigiusza Rączki.
Wiycie, bydzie już dobrze pora lot, jak wszyndzi kaj yno wejżicie trombi sie ło cholesterolu. Mi sie zdo, że godali już, keby nie jeś masła, jajec, tłostego miynsa, gynsi bo tam je niby cholesterol, yno przeciepnyć sie na margariny. Terozki sie godo, że margariny nie śmi sie jeś, yno masło, a jajca som pieronym zdrowe. Powiym wom, że człowiek już mo we głowie galert zamiast mózgu, bo nie wiy co myśleć.
A po mojimu, to trza jeś wszysko, yno z rozumym. I trza jeś podle mie to co je naturalne- a masło, jajca i dobre (nie wygonione) miynsotakim je.
No a co z tym cholesterolym? Powiym wom yno tela, bez niego nie do sie żyć. A jak mocie go za mało toż dopiero biyda. Bezmałaś jak je go myni niż 160 mg/dl to człowiek chodzi jakiś wylynkany, a i depresjo sie może prziwinyć. Bezto dycki godom, że ci co se pojedzom normalnie zarozki som bardzi radzi.
Cholesterol momy dobry (HDL) i zły (LDL). I yno tyn zły szwankuje nom serce i kludzi ku zawałom. Zaś bez tego dobrego nie bardzo idzie żyć, zresztom z niskim HDL tyż mogymy dostać zawału. A tak po prowadzie, to zawały sie bierom z niedoborow aminokwasow, kwasow Omega składnikow mineralnych.
Roztomili Ludkowie dzisio miażdżyca może mieć kożdy- choćby i mały bajtel kiery durch jy chipsy i roztomańte insze bibzdy. Beztoż to ni ma pedziane, że człowiek chrubszy czy starszy musi mieć zły cholesterol. Dbejcie yno o normalne jedzyni, bez chymie, ruszcie swoji sztyry literki, a cholesterol bydziecie mieć żileta. Pyrsk.
Trombi – ogłasza się
Kludzi – prowadzi
Durch – ciągle