Ludzie dobrej woli

Wiycie godo sie, że momy społeczno znieczulica. Bo co chwila słyszy sie o roztomańtych przipadkach, kaj szkut sie na gowie jyży, że ludzie take mogom być.

A jo chca wom połosprowiać ło tym, że może nikiedy być blank inakszy i tak tyż było w zeszło niedziela.

W Jastrzymbiu boł „Bieg dla Kubusia”. Z cołkigo Ślońska przijachali ludzie, żeby lecieć po zdrowi takigo maluszka kiery je fest chory. Żebyście dobrze zrozumieli- szło w tym ło to, że kożdy kiery sztartowoł, ciepoł do putnie wiela yno umioł, a potym dziypiyro lecioł.

A wszysko z tej putnie szło na aparatura do maluszka, żeby mog normalnie funkcjonować, a przede wszystkim żyć. Co mie zafascynowało? A to, że ludzie kierzi wcale nie znali tego bajtla, przijechali żeby pomoc.

Wiycie mom nikiedy taki odczuci, że ludzie udowajom, że nie widzom, abo wolom nie widzieć. Yno pogratulować takigo rozumowanio.

Jo w zeszło niedziela tyż ech tam boł, nawarzoł bigosu i dzieloł tych kierzi lecieli po zdrowi. Nie wyobrażom se, żeby nie pomoc jak yno idzie. Przeca nie wiymy co nos czeko w prziszłości. Ni mocie pojyncio, jak je żech rod, że bołech tam i widzioł żech tych zadowolonych ludzi, kierzi chcieli pomogać. Uśmiychnyci, pogodni bez zmierzlowanio sie.

Stwierdzioł ech też, że świat ni ma jeszcze tak zepsuty, jak go pokazujom.

Życza wom na swoji drodze dużo szczynśliwych ludzi, kierym pomogani dowo dużo radości.

Szkut – włos

Putnia – puszka

Zmierzlować się – być zrzędliwym