Ni ma to jak się wygrzoć
Felieton Remigiusza Rączki
Mieli my piykno zima ze śniegiym, mrozym, tako jak to rychtyk mo być, a teraz wielko odwilż. Yno kidze i kidze z nieba, chodzić nie idzie, bo zola spod szczewikow odjyżdżo, o zarazkach nie spomna. A przi takij pogodzie furgajom kaj yno czlowiek się łobroci.
Tako pogoda, to je czysto wylyngarnia kaj jakigo pieroństwa, po kierym panujom gripy, anginy, abo jeszcze gorsze rzeczy.
Beztoż mom do wos rozwiązani, jako się bronić i nie być chorym. Przeca czakani, aż nom coś bydzie ni mo synsu. Jedni bierom roztomańte pilulki na odporność, kiere i tak nie wiym czy do końca nom służom, a inksi, miyndzy tym i jo, wierzom w zbawiynno moc sauny.
Dycki godom, że tyn co wymyśloł sauna musioł by dostać Nobla.
Podle mie, nojlepszo je sucho, w kierej koniecznie musi być kole 90 stopni C. Do jednych to je hyc nie do zdzierżynio, ale to się tak yno zdo.
Idzie wytrzimać. Ale nojważniejsze, żeby wiedzieć jako i nie siedzieć do upadłego. Bo sauna je zdrowo, ale trza wiedzieć jako to funguje.
Bezmałaś nojlepszy 3 serie. Piyrszy roz dobrze je wytrzimać 15 minut, drugo kole 10-12, a trzecio chocioż 8-10. Choć musza wom pedzieć, że nojlepszy to słuchać swojigo organizmu i jak nom pompka zwano sercym zaczyno pukać dość fest, lepszy wylyź.
No i jeszcze bardzo ważno sprawa. Miyndzy wejściami trza się dobrze wychłodzić i dychnyć.
Przi saunie pośpiych ni ma dobry.
Ale za to po saunie czlowiek czuje się jak młody Bóg. Skora na gymbie naciągnyto, o samopoczuciu nie spomna. I co nojważniejsze- w 90 stopniach ginom kaj jaki zarazki.
Roztomili w tako pogoda- yno sauna. Pyrsk
Kidze – pada
Pilulki – tabletki
Funguj – e-działa