Dejcie se pozor na cola

Wiycie świat leci wartko do przodku, a my nikiedy wciepujymy do sia bele co i tyż lecymy kanś choby kot z pachażinom. Nejgorsze w tym wszyskim je to, że nikiedy nie myślymy czy to, co jymy i pijymy je zdrowe.

A tak se myśla, że zabijo nos cukier- moga pedzieć wszechobecny. Kaj jako etykietka weznymy, tam je cukier, abo aspartan, czy jeszcze jakieś inksze słodziki.

W jogurtach, musli, gotowych daniach, o napojach słodzących nie spomna.

Nie wiym czy wiycie, że w jednym litrze coca coli je 20 łyżek cukru. Spróbujcie zjeś łoroz 20 łyżek cukru. Myśla, że nie jedyn by „chewtnoł”.

Czymu 2 miliony Polokow mo cukrzica typu 2? A właśnie tak se myśla, że skuli tego.

Do tego cukier, kiery je w coli uzależnio jak narkotyk. Pijesz, ale durch chcesz wiyncyj.

Nie wiym czy wiycie, że dużo wypadkow samochodowych je tyż skuli cole.

A już godom jako to tymu je. Jedzie szofer i pije cola. Poziom cukru we krwi mu automatycznie sie dźwigo. Ale zarozki po tym trzustka zaczyno wydzielać insulina, żeby tyn poziom cukru wyrównać. Czyli som my w tym czasie bardzo synni. Nie jedyn już tak usnoł za kierownicom, a potym to już przeca scenariusz znocie.

Do tego barwnik cole (piykny bronotny kolor) je rakotwórczy, bo dopuszczalno norma w Europie je przekroczono 200%. I co?

Jo myśla, że została nom woda z fefermynicom, abo kompot nojlepszy uważony ze stewiom. Stewia to taki zielsko, kiere mo liście słodkie jak miod, a kalorii praje 0. Je żeś tym co jysz i pijesz, beztoż wybor noleży do wos.

---

Praje – prawie

Fefermynica – mięta

Szofer – kierowca