Ploty

Wiycie zdało mi sie, że żyjymy w państwie katolickim, kaj wartości chrześcijańske som fest ważne. Ale jak tak sie dziwom na to, jak co nikierzi funkcjonujom, to wzywam pomału o pomsta do nieba.

Zowistność, nieżyczliwość i do tego nejgorszo rzecz, jako ludziska wymyślyli plotka.

To, że ludzie muszom se pogodać to jo już downo wiym, ale jak godajom z pluc, to zaczyn omie to wnerwiać. Nie boł, nie widzioł, ale godo i nojwiyncyj sie doktoryzuje.

A ku tymu dorobi jeszcze swoja wersjo, kaj dociepnie pora groszy. I tak momy super plotka.

Takich ludzi nie brakuje, co durch yno zajmujom sie plotami.

A z drugij strony, je mi takich ludzi żol. Bo przeca jacy łoni muszom być biydni, że nikaj nie byli, nic nie zrajzowali i ni majom ło czym rozprowiać. A tak majom plotka i mogom paplać.

A ku tymu, jak komuś ubliżom i dowalom, to aż serce sie jim śmieje.

Yno pamiyntejcie, że kożdy odpowiy kiedyś za swe i to jakim boł człowiekiym.

Myśla, że diobołek aż rynce zaciyro, żeby dostać takigo delikwenta, kiery cołkie życie ubliżoł innym. A tam palynisko już je narychtowane.

Roztomili pamiyntejcie, że złość ludzko wraco ze zwojonom siłom, betoż, jak słyszycie jakieś gupie ploty, to spamiyntejcie tego, wto to godo. A je żeś tym co jysz i godosz.

Pyrsk!

---

Zawistność – zazdrość

Durch – cały czas

Rozprowiać – rozmawiać